(၁၆-၁-၂၀၂၅ ရက်၊ နန်နင်းမြို့)
တရုတ်နိုင်ငံ၊ ကွမ်ရှီးဒေသ၊ နန်နင်းမြို့တွင် ၁၆-၁-၂၀၂၅ ရက်နေ့၌ ကျင်းပခဲ့သော Global Mayor Dialogue (GMD) သို့ ရန်ကုန်မြို့တော်စည်ပင်သာယာရေးကော်မတီ၊ ဥက္ကဋ္ဌ (မြို့တော်ဝန်) ဦးဗိုလ်ဌေး ဦးဆောင်သည့်ကိုယ်စားလှယ်အဖွဲ့နှင့်အတူ နန်နင်းမြို့၊ မြန်မာကောင်စစ်ဝန်ချုပ်ရုံး၊ ကောင်စစ်ဝန်ချုပ် ဒေါ်ခိုင်ဆုလင်း ပါဝင်တက်ရောက်ခဲ့ပါသည်။
၁၆-၁-၂၀၂၅ ရက်နေ့တွင် GMD အခမ်းအနားမတိုင်မီ ရန်ကုန်မြို့တော်ဝန် ဦးဗိုလ်ဌေး နှင့် ကွမ်ရှီးဒေသအုပ်ချုပ်ရေးမှူး Mr. Lan Tianli တို့ တွေ့ဆုံစဉ် နှစ်နိုင်ငံ ကုန်သွယ်မှုမြှင့်တင် ရေး၊ အသက်မွေးဝမ်းကြောင်းပညာသင်တန်းများ ဖွင့်လှစ်ရေး၊ မြန်မာနိုင်ငံတွင် လာရောက် ရင်းနှီး၏မြှုပ်နှံရေးနှင့် ၂၀၂၅ ခုနှစ်၊ စက်တင်ဘာလတွင် ကျင်းပမည့် တရုတ်-အာဆီယံကုန်စည် ပြပွဲ (CAEXPO) တွင် ပူးပေါင်းဆောင်ရွက်ရေးကိစ္စများကို ဆွေးနွေးခဲ့ကြပါသည်။
ထို့နောက် GMD ကို ဆက်လက်ကျင်းပခဲ့ရာ ကွမ်ရှီးဒေသ CPC ပါတီအမြဲတမ်းကော်မတီ အဖွဲ့ဝင်နှင့် နန်နင်းမြို့ CPC ပါတီအတွင်းရေးမှူး Mr. Nong Shengwen၊ လာအို၊ ဗီယန်ကျင်းမြို့ အုပ်ချုပ်ရေးမှူး Mr. Athsaphangthong Siphandone၊ ဗီယက်နမ်၊ Lang Son မြို့ ပြည်သူ့ ကော်မတီဥက္ကဋ္ဌ Mr. Nguyen Van Hanh တို့က အဖွင့်အမှာစကားများ ပြောကြားခဲ့ကြပါသည်။ ထို့ပြင် ဆွေးနွေးပွဲသို့ ရန်ကုန်မြို့တော်ဝန် ဦးဗိုလ်ဌေး၊ ထိုင်း၊ Surat Thani ပြည်နယ် ဒုတိယ အုပ်ချုပ်ရေးမှူး Mr. Bundan Sathirachawal၊ မလေးရှား Kulim မြို့ အမှုဆောင်ကောင်စီ အဖွဲ့ဝင် Mr. YB. Wong Chia၊ ဗီယက်နမ်၊ Mong Cai ပြည်သူ့ကော်မတီဥက္ကဋ္ဌ Mr. Ho Quang Huy၊ ကမ္ဘောဒီးယား၊ Siem Reap ဒုတိယမြို့တော်ဝန် Mr. Hay Yong နှင့် အင်ဒိုနီးရှား Mataram မြို့တော်ဝန်၏ ကိုယ်စားလှယ် Mr. Supaindi၊ နန်နင်းမြို့အခြေစိုက် ကောင်စစ်ဝန် ချုပ်ရုံးများမှ ကောင်စစ်ဝန်ချုပ်များစသည့် ဧည့်သည် စုစုပေါင်း (၁၀၀၀)နီးပါး တက်ရောက် ခဲ့ကြပါသည်။
အဆိုပါအခမ်းအနား၌ နန်နင်းမြို့နှင့် ရန်ကုန်မြို့တို့အကြား၂၀၂၅-၂၀၂၆ ခုနှစ် ချစ်ကြည် ရင်းနှီးမှုဖလှယ်ရေး နားလည်မှုစာချွန်လွှာကို ရန်ကုန်မြို့တော်ဝန် ဦးဗိုလ်ဌေးနှင့် နန်နင်း ဒုတိယ မြို့တော်ဝန် Mr. Guo Wei တို့က လက်မှတ်ရေးထိုးခဲ့ကြပါသည်။ ထို့ပြင် ပိုမိုသာယာဝပြောပြီး ချိတ်ဆက်ထားသော တရုတ်-အာဆီယံအသိုက်အဝန်းအတွက် မြို့အများအကြား ပူးပေါင်း ဆောင်ရွက်မှုကို မြှင့်တင်မည့် “Nanning Initiatives” ကို ထုတ်ပြန်ခဲ့ပါသည်။
