ကုလသမဂ္ဂစားနပ်ရိက္ခာနှင့် စိုက်ပျိုးရေးအဖွဲ့ (FAO) ၏ (၁၈၁) ကြိမ်မြောက် ကောင်စီ အစည်းအဝေးကို အီတလီနိုင်ငံ၊ ရောမမြို့အခြေစိုက် FAO ဌာနချုပ်၌ ၂၀၂၆ ခုနှစ်၊ ဇွန်လ ၈ ရက်မှ ၁၂ ရက်အထိ ကျင်းပခဲ့ရာ မြန်မာသံရုံး၊ ရောမမြို့မှ သံရုံးယာယီတာဝန်ခံ ဦးစိုးသက်နောင် ဦးဆောင်သည့် မြန်မာကိုယ်စားလှယ်အဖွဲ့ တက်ရောက်ခဲ့ပါသည်။
ကောင်စီအစည်းအဝေးကို Independent Chairperson of the Council ဖြစ်သူ Mr. Mina Rizk က သဘာပတိအဖြစ် ဆောင်ရွက်ခဲ့ပြီး FAO ညွှန်ကြားရေးမှူးချုပ် Dr. Qu Dongyu က FAO အဖွဲ့၏ လက်ရှိဆောင်ရွက်နေမှုအခြေအနေများ၊ ကြုံတွေ့နေရသည့် စိန်ခေါ်မှုများနှင့် အနာဂတ် တွင် ဦးစားပေးဆောင်ရွက်သွားမည့် ကိစ္စရပ်များနှင့်စပ်လျဉ်း၍ ရှင်းလင်းပြောကြားခဲ့ပါသည်။
ကောင်စီအစည်းအဝေးတွင် ကမ္ဘာလုံးဆိုင်ရာ စားနပ်ရိက္ခာဖူလုံမှုတွင် ကြုံတွေ့နေရသည့် စိန်ခေါ်မှုများ၊ အကျပ်အတည်းများဖြေရှင်းရာတွင် FAO ၏ အရေးပေါ်တုံ့ပြန်ဆောင်ရွက်မှုများ၊ လက်တွဲ ပူးပေါင်းဆောင်ရွက်မှုအစီအစဉ်၏ ဖြစ်ပေါ်တိုးတက်မှုများ၊ အနာဂတ်ပြုပြင်ပြောင်းလဲမှု များအတွက် လုပ်ငန်းအဖွဲ့အသီးသီး၏ လုပ်ကိုင်ဆောင်ရွက်နေမှု အခြေအနေများနှင့်စပ်လျဉ်း၍ ကောင်စီအဖွဲ့ဝင်နိုင်ငံများအကြား အမြင်ချင်းဖလှယ်ဆွေးနွေးခဲ့ပါသည်။ ထို့ပြင် သက်ဆိုင်ရာ ကော်မတီအသီးသီးမှလည်း ကျင်းပပြီးစီးခဲ့သည့် ဒေသဆိုင်ရာကွန်ဖရင့်များနှင့် ဆောင်ရွက်ပြီးစီးမှု အစီရင်ခံစာများကို ကောင်စီအစည်းအဝေးသို့ တင်သွင်းခဲ့ကြပါသည်။
