(၂၆-၉-၂၀၂၃ ရက်၊ မော်စကို)
ရုရှားဖက်ဒရေးရှင်းနိုင်ငံဆိုင်ရာ မြန်မာသံအမတ်ကြီး ဦးလွင်ဦးသည် Center for Strategic Development in Civil Aviation (AVIACENTER) ၏ စီစဉ်မှုဖြင့် မော်စကိုမြို့တွင် စက်တင်ဘာလ ၂၆-၂၇ ရက်အထိ ကျင်းပလျက်ရှိသည့် (၆) ကြိမ်မြောက် International Route Development Forum NETWORK 2023 ၏ မျက်နှာစုံညီအစည်းအဝေးသို့ ၂၆-၉-၂၀၂၃ ရက်တွင် ပါဝင်တက်ရောက်ခဲ့ပါသည်။
မျက်နှာစုံညီအစည်းအဝေးတွင် ဥရောပအာရှစီးပွားရေးကော်မရှင်၊ Department of Transport and Infrastructure ၏ Deputy Director ဖြစ်သူ Ms. Sherysheva Elena Ivanovna က အဖွင့်အမှာစကား ပြောကြားခဲ့ပါသည်။ ထို့နောက် မြန်မာသံအမတ်ကြီးက “Direct flight from Myanmar to Russia: Gateway to a new unique destination for Russian tourists” ဟူသော ခေါင်းစဉ်ဖြင့် ပြောကြားရာတွင် မြန်မာ-ရုရှား နှစ်နိုင်ငံအကြား Myanmar Airways International (MAI) က ရန်ကုန်-မန္တလေး-နိုဗိုစီဗစ် တိုက်ရိုက်လေကြောင်းခရီးစဉ်သစ် ပြေးဆွဲနိုင်ခဲ့မှု၊ မြန်မာနိုင်ငံ၏ တည်နေရာ၊ ပထဝီအနေအထားနှင့် အခြေခံအချက်အလက်များ၊ နိုင်ငံခြားခရီးသွားများကို ဆွဲဆောင်နိုင်သည့် မြန်မာနိုင်ငံရှိ အထင်ကရနေရာများ၊ ရုရှားနိုင်ငံသားများအတွက် မြန်မာနိုင်ငံအနေဖြင့် ဗီဇာကင်းလွတ်ခွင့် ခွင့်ပြုထားမှုအခြေအနေ၊ ရုရှားခရီးသွားများ မြန်မာနိုင်ငံသို့ ပိုမိုလာရောက်လည်ပတ်နိုင်ရေးအတွက် “Welcome Russia” အစီအစဉ်အရ မြန်မာအစိုးရ၏ လုပ်ဆောင်နေမှုများ၊ မြန်မာနိုင်ငံ၏ ခရီးသွားလုပ်ငန်းဆိုင်ရာ အခွင့်အလမ်းများကို ဆွေးနွေးပြောကြားခဲ့ပြီးနောက် မြန်မာနိုင်ငံ၏ ခရီးသွားလုပ်ငန်းမြှင့်တင်ရေးဗီဒီယိုကို ပြသခဲ့ကြောင်း သိရှိရပါသည်။
