အီသီယိုးပီးယားနိုင်ငံဆိုင်ရာ မြန်မာသံအမတ်ကြီး ဦးအောင်မင်းဦးသည် အီသီယိုပီးယား နိုင်ငံဆိုင်ရာ ဥရောပသမဂ္ဂသံအမတ်ကြီး H.E. Mrs. Sofie From-Emmesberger နှင့် အာဖရိက သမဂ္ဂဆိုင်ရာ ဥရောပသမဂ္ဂသံအမတ်ကြီး H.E. Mr. Javier Nino Perez တို့၏ ဖိတ်ကြားချက်အရ ၂၀၂၆ ခုနှစ်၊ မေလ ၇ ရက်နေ့တွင် အဒစ်အဘာဘာမြို့ရှိ Sheraton Hotel ၌ ကျင်းပပြုလုပ်သော ဥရောပနေ့ (Europe Day) ဧည့်ခံပွဲ အခမ်းအနားသို့ တက်ရောက်ခဲ့ပါသည်။
အခမ်းအနားတွင် အီသီယိုးပီးယားနိုင်ငံဆိုင်ရာ ဥရောပသမဂ္ဂသံအမတ်ကြီးက အဖွင့်အမှာ စကား ပြောကြားရာ၌ နှစ်နိုင်ငံဆက်ဆံရေးနှင့် အီသီယိုးပီးယားနိုင်ငံနှင့် လက်ရှိထိတွေ့ ဆက်ဆံမှုများ၏ တိုးတက်ပြောင်းလဲလာသော အခြေအနေများကို အလေးပေး ပြောကြားခဲ့ ပါသည်။ ၎င်းအပြင် နိုင်ငံအဆင့် ပူးပေါင်းဆောင်ရွက်မှုများသာမက ဒေသတွင်းအဖွဲ့အစည်းများ၊ အထူးသဖြင့် အာဖရိကသမဂ္ဂ (AU) နှင့် ပူးပေါင်းဆောင်ရွက်မှုများကို တိုးမြှင့်ခြင်းဖြင့် ဆက်ဆံရေး ပိုမိုခိုင်မာစေရန်၊ ဒေသတွင်း လုံခြုံရေးမှသည် ရေရှည်တည်တံ့သော စီးပွားရေးဖွံ့ဖြိုးတိုးတက်မှု အထိ ပူးပေါင်းဆောင်ရွက်ရေးနှင့် နိုင်ငံတကာရေးရာကိစ္စရပ်များကို ဖြေရှင်းရာတွင် နိုင်ငံစုံ ပူးပေါင်းဆောင်ရွက်မှု (Multilateralism) ၏ အရေးပါပုံကိုလည်း ထည့်သွင်းပြောကြားခဲ့ပါသည်။
အဆိုပါ အခမ်းအနားသို့ အီသီယိုးပီးယားနိုင်ငံ ဘဏ္ဍာရေးဝန်ကြီး H.E. Ahmed Shide နှင့် အစိုးရအဖွဲ့မှ အဆင့်မြင့်အရာရှိကြီးများ၊ အာဖရိကသမဂ္ဂကော်မရှင် Chief of Staff H.E. Mohamed El-Amine Souef နှင့် အာဖရိကသမဂ္ဂမှ အဆင့်မြင့်အရာရှိကြီးများ၊ အဒစ်အဘာဘာ မြို့အခြေစိုက် သံအမတ်ကြီးများ၊ သံရုံးအဖွဲ့အစည်းအကြီးအကဲများ၊ သံတမန်များနှင့် အခြား ဖိတ်ကြားထားသော ဧည့်သည်တော်များ တက်ရောက်ခဲ့ကြပါသည်။
