အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီးက မြန်မာနိုင်ငံဆိုင်ရာ နီပေါနိုင်ငံသံအမတ်ကြီးအား လက်ခံတွေ့ဆုံ

(၁၀-၇-၂၀၂၀ ရက်၊ နေပြည်တော်)

အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီး ဦးကျော်တင်သည် မြန်မာနိုင်ငံဆိုင်ရာ နီပေါသံအမတ်ကြီး H.E. Mr. Bhim K. Udas အား ၁၀-၇-၂၀၂၀ ရက်၊ (၁၀၀၀) နာရီတွင် နိုင်ငံခြားရေးဝန်ကြီးဌာန၌ လက်ခံတွေ့ဆုံခဲ့သည်။

ထိုသို့တွေ့ဆုံရာတွင် နီပေါသံအမတ်ကြီးက မြန်မာနိုင်ငံတွင် နိုင်ငံတော်၏အတိုင်ပင်ခံပုဂ္ဂိုလ်၏ ဦးဆောင်မှုနှင့် ပြည်သူများ စည်းကမ်းလိုက်နာမှုဖြင့် ကိုဗစ်-၁၉ ရောဂါကို ကောင်းစွာ ထိန်းချုပ်ထားနိုင်ခြင်းအတွက် ဂုဏ်ပြုချီးကျူးကြောင်းနှင့် ဖားကန့်တွင် မြေပြို၍ အသက်များစွာ ဆုံးရှုံးခဲ့ရခြင်းအတွက် ဝမ်းနည်းကြောင်း ဦးစွာပြောကြားခဲ့ပြီး၊ ကိုဗစ်-၁၉ ရောဂါ ကာကွယ် ထိန်းချုပ်ရေးအတွက် ဆောင်ရွက်နေသည့် နှစ်နိုင်ငံအတွေ့အကြုံများ၊ ယင်းကူးစက်ရောဂါကြောင့် လူမှုစီးပွားရေးအပေါ် အကျိုးသက်ရောက်မှုများ လျော့ပါးရန် ကုစားနိုင်ရေးဆိုင်ရာ ကိစ္စရပ်များ၊ အဓိကထိခိုက်မှုများရှိသည့် ခရီးသွားလုပ်ငန်းနှင့် အသေးစားနှင့် အလတ်စား စီးပွားရေးလုပ်ငန်းများ ပြန်လည်ဦးမော့လာစေရေးအတွက် ပူးပေါင်းဆောင်ရွက်နိုင်မည့် အခြေအနေများ၊ နှစ်ကုန်ပိုင်းခန့်တွင် လုမ္မနီဥယျာဉ်သို့ မြန်မာနိုင်ငံမှ ဘုရားဖူးခရီးစဉ်များစတင်ရေးနှင့် လေယာဉ်ပျံသန်းပြေးဆွဲရေး အလားအလာများ၊ ကိုဗစ်-၁၉ ရောဂါအား ထိရောက်စွာ ထိန်းချုပ်နိုင်သည့်အခါ မြန်မာ-နီပေါ သံတမန် ဆက်ဆံရေးထူထောင်သည့် နှစ်(၆၀)ပြည့် အထိမ်းအမှတ် ဆွေးနွေးပွဲနှင့် လှုပ်ရှားမှုများ ကျင်းပသွားနိုင်မည့် အခြေအနေများ၊ ကိုဗစ်-၁၉ အလွန် နှစ်နိုင်ငံအကြား အဆင့်မြင့်ကိုယ်စားလှယ်အဖွဲ့ ခရီးစဉ်များ အပြန်အလှန်သွားရောက်ရန် စီစဉ်သွားနိုင်မည့် အခြေအနေများနှင့် နှစ်နိုင်ငံဆက်ဆံရေးနှင့် ဒေသတွင်းနှင့် နိုင်ငံတကာမျက်နှာစာတို့တွင် နီးကပ်စွာ ဆက်လက်ပူးပေါင်း ဆောင်ရွက်နိုင်မည့် အခြေအနေများနှင့် စပ်လျဉ်း၍ ရင်းနှီးပွင့်လင်းစွာ အမြင်ချင်းဖလှယ်ဆွေးနွေးခဲ့ကြကြောင်း သိရှိရသည်။