အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီးက မြန်မာနိုင်ငံဆိုင်ရာ ဒိန်းမတ် သံအမတ်ကြီးအား လက်ခံတွေ့ဆုံ

အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီး ဦးကျော်တင်သည် မြန်မာနိုင်ငံဆိုင်ရာ ဒိန်းမတ်သံအမတ်ကြီး H.E. Mr. John Nielsen အား ၁၁-၂-၂၀၂၀ ရက် ၊ (၁၆၀၀) နာရီတွင် နေပြည်တော်ရှိ နိုင်ငံခြားရေးဝန်ကြီးဌာန၊ ဧည့်ခန်းမ၌ လက်ခံတွေ့ဆုံခဲ့သည်။

ထိုသို့တွေ့ဆုံရာတွင် ဒိန်းမတ်နိုင်ငံမှ မြန်မာနိုင်ငံသို့ ဖွံ့ဖြိုးရေးအကူအညီပေးရေးဆိုင်ရာ Country Programme (2016-2020) အောက်မှ နှစ်နိုင်ငံအကြား လက်ရှိပူးပေါင်းဆောင်ရွက်လျက်ရှိသည့် စီမံကိန်းအခြေအနေများ၊ ယခုနှစ်မကုန်မီ Country Programme အသစ် ညှိနှိုင်းရေးဆွဲရေးကိစ္စနှင့် နှစ်နိုင်ငံ နိုင်ငံခြားရေး ဝန်ကြီးဌာနများအကြား ဆွေးနွေးမှုယန္တရား တည်ထောင်ရေးကိစ္စများကို ဆွေးနွေးခဲ့ပါသည်။

ပြည်ထောင်စုဝန်ကြီးက ရခိုင်ပြည်နယ်တွင် အစိုးရမှ တည်ငြိမ်အေးချမ်းမှုရရှိရေး၊ လူမှုသဟဇာတဖြစ်ရေး၊ ဖွံ့ဖြိုးတိုးတက်ရေးနှင့် Independent Commission of Enquiry – ICOE အစီရင်ခံစာနှင့်ပတ်သက်၍ ပြည်တွင်း တရားစီရင်ရေး လုပ်ငန်းစဉ်ဖြင့် တာဝန်ခံမှု၊ တာဝန်ယူမှုရှိစေရေး ကိစ္စအတွက် ကြိုးပမ်းဆောင်ရွက်နေမှုများကို ရှင်းလင်းပြောကြားခဲ့ကြောင်း သိရှိရပါသည်။