မြန်မာသံရုံး၊ လန်ဒန်မြို့မှ အဘိဓမ္မာစာမေးပွဲ ကျင်းပခဲ့ခြင်း

(၂၄-၁၂-၂၀၁၉ ရက်၊ လန်ဒန်မြို့)

ပြည်ထောင်စုသမ္မတမြန်မာနိုင်ငံတော်၊ သာသနာရေးနှင့် ယဉ်ကျေးမှုဝန်ကြီးဌာနက ကျင်းပပြုလုပ်သည့် အဘိဓမ္မာ၊ ဂုဏ်ထူးဆောင်နှင့် ဝိသုဒ္ဓိမဂ်စာမေးပွဲများကို မြန်မာသံရုံး၊ လန်ဒန်မြို့မှ ကြီးမှူး၍ လန်ဒန်မြို့၊ တိသရဏဝိဟာရ(မြောင်းမြ)ကျောင်းတိုက် စာစစ်ဌာန၌ ၂၀၁၉ ခုနှစ်၊ ဒီဇင်ဘာလ ၂၀ ရက်နေ့မှ ၂၂ ရက်နေ့အထိ ကျင်းပပြုလုပ်ခဲ့ပါသည်။

အဆိုပါစာမေးပွဲသို့ ဗြိတိန်နိုင်ငံတစ်ဝှမ်းရှိ မြန်မာအသိုက်အဝန်းမှ ဗုဒ္ဓဘာသာဝင်ပုဂ္ဂိုလ်များ ဝင်ရောက်ဖြေဆိုခဲ့ရာ ၂၀-၁၂-၂၀၁၉ ရက်နေ့တွင် အဘိဓမ္မာ(ပထမအဆင့်) စာမေးပွဲသို့ (၅)ဦး၊ အဘိဓမ္မာ (ဂုဏ်ထူးဆောင်၊ ပထမအဆင့်) စာမေးပွဲသို့ (၁)ဦး၊ ဝိသုဒ္ဓိမဂ် (ပထမအဆင့်) စာမေးပွဲသို့ (၃)ဦး၊ ၂၁-၁၂-၂၀၁၉ ရက်နေ့တွင် အဘိဓမ္မာ (ဒုတိယအဆင့်) စာမေးပွဲသို့ (၁၂)ဦး၊ ဝိသုဒ္ဓိမဂ် (ဒုတိယအဆင့်) စာမေးပွဲသို့ (၅)ဦး၊ ၂၂-၁၂-၂၀၁၉ ရက်နေ့တွင် အဘိဓမ္မာ (တတိယအဆင့်) စာမေးပွဲသို့ (၁၀)ဦး၊ ဝိသုဒ္ဓိမဂ် (တတိယအဆင့်) စာမေးပွဲသို့ (၃)ဦး အသီးသီးဝင်ရောက်ဖြေဆိုခဲ့ကြပါသည်။

အဆိုပါ စာမေးပွဲကျင်းပရာသို့ ဗြိတိန်နိုင်ငံဆိုင်ရာ မြန်မာသံအမတ်ကြီး ဦးကျော်စွာမင်း တက်ရောက်အားပေးခဲ့ပြီး၊ ဥက္ကဋ္ဌဆရာတော် အရှင်ဇနက အမှူးပြုသော လန်ဒန်မြို့ရှိ ကျောင်းတိုက်အသီးသီးမှ စာမေးပွဲကြီးကြပ်ဆရာတော်များနှင့်အတူ မြန်မာသံရုံး၊ လန်ဒန်မြို့တို့မှ ကြပ်မတ်ဆောင်ရွက်ပေးခဲ့ကြောင်း သိရှိရပါသည်။