ဖင်လန်နိုင်ငံဆိုင်ရာ မြန်မာသံအမတ်ကြီး ဒေါ်ယဉ်ယဉ်မြင့် ဖင်လန်နိုင်ငံ လွတ်လပ်ရေးနေ့ဧည့်ခံပွဲသို့ တက်ရောက်ခဲ့ခြင်း

(၁၁-၁၂-၂၀၁၉ ရက်၊ ဟယ်လ်ဆင်ကီးမြို့)

ဖင်လန်နိုင်ငံဆိုင်ရာ မြန်မာသံအမတ်ကြီး ဒေါ်ယဉ်ယဉ်မြင့်သည် ၂၀၁၉ ခုနှစ်၊ ဒီဇင်ဘာလ ၆ ရက်တွင် ဟယ်လ်ဆင်ကီးမြို့ သမ္မတနန်းတော်တွင် ကျင်းပသော ဖင်လန်နိုင်ငံ လွတ်လပ်ရေးနေ့ဧည့်ခံပွဲသို့ တက်ရောက်ခဲ့ပြီး ဖင်လန်နိုင်ငံ သမ္မတ Sauli Niinistö အား ဂါရဝပြုနှုတ်ဆက်ခဲ့ပါသည်။ ထို့နောက် သံအမတ်ကြီးသည် ဖင်လန်နိုင်ငံ လွတ်လပ်ရေးနေ့ ဂုဏ်ပြုမှတ်တမ်း (Golden Book) တွင် ဂုဏ်ပြုဆုတောင်းလွှာ ရေးသားခဲ့ပါသည်။

သံအမတ်ကြီး ဒေါ်ယဉ်ယဉ်မြင့်သည် ၂၀၁၉ ခုနှစ်၊ ဒီဇင်ဘာလ ၉ ရက်တွင် ဖင်လန် နိုင်ငံခြားရေးဝန်ကြီးဌာန အာရှနှင့် အမေရိကဌာန၊ ညွှန်ကြားရေးမှူးချုပ် H.E. Mrs. Piritta Asunmaa အား တွေ့ဆုံနှုတ်ဆက်ခဲ့ပြီး၊ နှစ်နိုင်ငံဆက်ဆံရေး တိုးတက်ဖြစ်ပေါ်မှုများ၊ အထူးသဖြင့် ၂၀၁၉ ခုနှစ်၊ အောက်တိုဘာလအတွင်း ဖင်လန် နိုင်ငံခြားရေးဝန်ကြီးဌာန ဒုတိယဝန်ကြီး ခေါင်းဆောင်သော အဆင့်မြင့်ကိုယ်စားလှယ်အဖွဲ့၏ မြန်မာနိုင်ငံခရီးစဉ်တွင်း ဆွေးနွေးမှု ရလဒ်များနှင့် ပတ်သက်၍ ဆွေးနွေးခဲ့ပါသည်။

ထို့နောက် သံအမတ်ကြီးသည် ထိုနေ့ နေ့လယ်ပိုင်းတွင် ဖင်လန်နိုင်ငံ ကုန်သည်ကြီးများအသင်း၌ မြန်မာနိုင်ငံနှင့် ကုန်သွယ်ရန် စိတ်ဝင်စားမှုရှိသော ဖင်လန်လုပ်ငန်းရှင်များနှင့် တွေ့ဆုံ၍ မြန်မာနိုင်ငံတွင် စီးပွားရေးနှင့် ရင်းနှီးမြှုပ်နှံမှု ပြုလုပ်ခြင်းဖြင့် ရရှိနိုင်မည့် အခွင့်အလမ်းများကို ရှင်းလင်းပြောကြားခဲ့ကြောင်း သိရှိရပါသည်။