နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးစိုးဟန် ဘယ်လ်ဂျီယံနိုင်ငံ၊ ဘရပ်ဆဲလ်မြို့၌ ကျင်းပပြုလုပ်ခဲ့သည့် ဒုတိယအကြိမ်မြောက် အာဆီယံ-အီးယူ စဉ်ဆက်မပြတ် ဖွံ့ဖြိုးတိုးတက်ရေးဆိုင်ရာ ဆွေးနွေးပွဲနှင့် အာဆီယံ-အီးယူ အဆင့်မြင့်အရာရှိကြီးများ အစည်းအဝေးသို့ တက်ရောက်ခဲ့ခြင်း

(၁၃-၂-၂၀၂၀ ရက်၊ ဘရပ်ဆဲလ်မြို့)

နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးစိုးဟန်သည် ဘယ်လ်ဂျီယံနိုင်ငံ၊ ဘရပ်ဆဲလ်မြို့၌ ၁၀-၂-၂၀၂၀ ရက်နေ့တွင် ကျင်းပပြုလုပ်သည့် ဒုတိယအကြိမ်မြောက် အာဆီယံ-အီးယူ စဉ်ဆက်မပြတ် ဖွံ့ဖြိုး တိုးတက်ရေးဆိုင်ရာဆွေးနွေးပွဲ (2nd ASEAN-EU Dialogue on Sustainable Development) နှင့် ၁၁-၂-၂၀၂၀ ရက်နေ့တွင် ကျင်းပပြုလုပ်သည့် အာဆီယံ-အီးယူ အဆင့်မြင့် အရာရှိကြီးများ အစည်းအဝေး (ASEAN-EU Senior Officials’ Meeting) သို့ တက်ရောက်ခဲ့သည်။

၁၀-၂-၂၀၂၀ ရက်နေ့၌ ကျင်းပပြုလုပ်ခဲ့သည့် ဒုတိယအကြိမ်မြောက် အာဆီယံ-အီးယူ စဉ်ဆက်မပြတ် ဖွံ့ဖြိုးတိုးတက်ရေးဆိုင်ရာဆွေးနွေးပွဲ၌ ကမ္ဘာမြေကြီး စဉ်ဆက်မပြတ် စိမ်းလန်းစိုပြေရေးအတွက် ကာဗွန်ထုတ်လုပ်မှု ထိန်းချုပ်ရေး၊ ဒေသတွင်း ပေါင်းစည်းရေးအတွက် အားလုံးပါဝင်နိုင်သည့် စဉ်ဆက်မပြတ်ဖွံ့ဖြိုးတိုးတက်ရေး၏ အရေးပါမှုနှင့် ကျား/မ တန်းတူရှိမှုနှင့် အမျိုးသမီးများ၏ အလုပ်အကိုင်နှင့် စီးပွားရေးမြှင့်တင်မှုအခန်းကဏ္ဍများကို ဆွေးနွေးခဲ့ကြပါသည်။

အမြဲတမ်းအတွင်းဝန်သည် ၁၁-၂-၂၀၂၀ ရက်နေ့တွင် ကျင်းပပြုလုပ်သည့် အာဆီယံ-အီးယူ အဆင့်မြင့်အရာရှိကြီးများအစည်းအဝေးသို့ တက်ရောက်ခဲ့ပြီး အာဆီယံနှင့် အီးယူအကြား ပေါင်းစည်းဆက်နွယ်မှု (Connectivity) မှတစ်ဆင့် ပူးပေါင်းဆောင်ရွက်နိုင်မည့် ကိစ္စရပ်များနှင့် အလားအလာများကို ဆွေးနွေးခဲ့ပါသည်။ ဆွေးနွေးပွဲအပြီး၌ အာဆီယံနှင့် အီးယူအကြား ဆွေးနွေးခဲ့သည့် ရှေ့ဆက်ပူးပေါင်း ဆောင်ရွက်နိုင်မည့် ကိစ္စရပ်များနှင့် ပတ်သက်၍ သတင်းထုတ်ပြန်ချက် တစ်ရပ်ထုတ်ပြန်ခဲ့ပါသည်။

အစည်းအဝေးတက်ရောက်စဉ်ကာလအတွင်း အမြဲတမ်းအတွင်းဝန် ဦးစိုးဟန်သည် အီးယူ၏ အာဆီယံဆိုင်ရာ အဆင့်မြင့်အရာရှိကြီး Mr. Gunnar Wiegand ၊ ကမ္ဘောဒီးယား နိုင်ငံခြားရေးဝန်ကြီးဌာန၊ ဒုတိယဝန်ကြီး Mr. Kan Pharidh ၊ လာအိုနိုင်ငံခြားရေးဝန်ကြီးဌာန၊ ဒုတိယဝန်ကြီး Mr. Thongphane Savanphet၊ ထိုင်းနိုင်ငံခြားရေးဝန်ကြီးဌာန၊ အမြဲတမ်းအတွင်းဝန် Ms. Busaya Mathelin နှင့် စင်ကာပူနိုင်ငံခြားရေးဝန်ကြီးဌာန၊ ဒုတိယအမြဲတမ်းအတွင်းဝန် Mr. Stanley Loh တို့အား သီးခြားစီတွေ့ဆုံခဲ့ပြီး နှစ်ဖက်ဆက်ဆံရေးနှင့် ပူးပေါင်းဆောင်ရွက်မှု မြှင့်တင်ရေးကိစ္စရပ်များကို ဆွေးနွေးခဲ့ကြောင်း သိရှိရပါသည်။