ထိုင်းနိုင်ငံဆိုင်ရာ မြန်မာနိုင်ငံသံအမတ်ကြီး ဦးမျိုးမြင့်သန်းမှ ထိုင်းအလုပ်သမားဝန်ကြီး M.R. Chatu Mongkol Sonakul အား သွားရောက်တွေ့ဆုံ

(၁၁-၉-၂၀၁၉ ရက်၊ နေပြည်တော်)

ထိုင်းနိုင်ငံဆိုင်ရာ မြန်မာနိုင်ငံသံအမတ်ကြီး ဦးမျိုးမြင့်သန်းသည် ထိုင်းနိုင်ငံ၊ အစိုးရအဖွဲ့သစ်တွင် အလုပ်သမားဝန်ကြီးအဖြစ် ခန့်အပ်ခြင်းခံရသူ M.R. Chatu Mongkol Sonakul အား ၂၀၁၉ ခုနှစ်၊ စက်တင်ဘာလ ၁၀ ရက်၊ ၁၄:၃၀ နာရီတွင် ထိုင်းနိုင်ငံ၊ အလုပ်သမားဝန်ကြီးဌာန၊ ဝန်ကြီး၏ ဧည့်ခန်းမဆောင်၌ ယဉ်ကျေးမှုအရ သွားရောက် တွေ့ဆုံခဲ့ပါသည်။

ယင်းသို့ သွားရောက်တွေ့ဆုံစဉ် သံအမတ်ကြီးသည် ၂၀၁၉-၂၀၂၀ တွင် အလုပ်လုပ်ခွင့် သက်တမ်း ကုန်တော့မည့် ရွှေ့ပြောင်းအလုပ်သမားများအား နိုင်ငံပြင်ပထွက်စရာမလိုဘဲ (၂) နှစ် ခွင့်ပြုမည့်အတွက် ကျေးဇူးတင်ရှိပါကြောင်း၊ သို့ရာတွင် Visa Fees မှာ ယခင် (၂) နှစ်အတွက် ဘတ် (၅၀၀) ကောက်ခံရာမှ ယခု တစ်နှစ်လျှင် ဘတ် (၁၉၀၀) ကောက်ခံမည်ဟု သိရှိရပါသဖြင့် ယခင်အတိုင်း (၂)နှစ်လျှင် ဘတ် (၅၀၀) သာ ကောက်ခံရေး သက်ဆိုင်ရာတို့နှင့် ညှိနှိုင်းပေးစေလို ပါကြောင်း၊ ထိုင်းနိုင်ငံရှိ မြန်မာရွှေ့ပြောင်းအလုပ်သမားများ၏ ကလေးငယ်များအနေဖြင့် မြန်မာစာ တရားဝင် သင်ယူနိုင်ရေးအတွက် နည်းလမ်းရှာဖွေရန်၊ တရားဝင်ဖြစ်ရေး ဆောင်ရွက်ရန် အချိန်ပေးပြီးမှ အရေးယူမှုများ ဆောင်ရွက်သွားရန်၊ သက်ဆိုင်ရာဌာနများနှင့် လည်း ညှိနှိုင်းပေးပါရန် ပြောကြားခဲ့ကြောင်း သိရှိရပါသည်။