ထိုင်းနိုင်ငံဆိုင်ရာ မြန်မာသံအမတ်ကြီး ဦးမျိုးမြင့်သန်း ထိုင်းနိုင်ငံရှိ မြန်မာရွှေ့ပြောင်းအလုပ်သမားများ၏ ကလေးငယ်များ မြန်မာစာသင်ယူနိုင်ရေး ညှိနှိုင်းဖြေရှင်းရေးဆိုင်ရာ အစည်းအဝေးသို့ တက်ရောက်ခဲ့ခြင်း

(၂၇-၉-၂၀၁၉ ရက်၊ ဗန်ကောက်မြို့)

၂၇-၉-၂၀၁၉ ရက်နေ့တွင် ထိုင်းနိုင်ငံလွှတ်တော် အဆောက်အဦအသစ်၌ ထိုင်းနိုင်ငံ၊ လွှတ်တော် (House of Representatives) ဒုတိယဥက္ကဋ္ဌ Mr. Suchart Tonjaroen ဦးဆောင်၍ ကျင်းပပြုလုပ်ခဲ့သော ပညာသင်ကြားမှု ခေတ္တရပ်ဆိုင်းထားခြင်းခံရသည့် ထိုင်းနိုင်ငံ၊ ရနောင်းခရိုင်ရှိ မြန်မာစာသင်ကြားရေး စင်တာများနှင့်စပ်လျဉ်း၍ နည်းလမ်းရှာဖွေရေးဆိုင်ရာ အစည်းအဝေးသို့ ထိုင်းနိုင်ငံဆိုင်ရာ မြန်မာသံအမတ်ကြီး ဦးမျိုးမြင့်သန်း တက်ရောက်ခဲ့ပါသည်။ အဆိုပါ အစည်းအဝေးသို့ ထိုင်းဘက်မှ ရနောင်းခရိုင် အုပ်ချုပ်ရေးမှူးအပါအဝင် ပညာရေးနှင့် အလုပ်သမားဝန်ကြီးဌာနတို့မှ တာဝန်ရှိသူများ တက်ရောက်ခဲ့ကြပြီး မြန်မာဘက်မှ သံအမတ်ကြီးနှင့်အတူ သံအမတ် ဒေါ်အိအိတင်နှင့် သံရုံးတာဝန်ရှိသူများ၊ အလုပ်သမား သံအရာရှိများနှင့် အကြံပေးရှေ့နေတို့ တက်ရောက်ခဲ့ကြပါသည်။

အစည်းအဝေးတွင် သံအမတ်ကြီး ဦးမျိုးမြင့်သန်းက ထိုင်းနိုင်ငံရောက် မြန်မာရွှေ့ပြောင်း အလုပ်သမားများ၏ သားသမီးများ မြန်မာစာသင်ကြားခွင့်ရရှိရေးအတွက် ထိုင်းနိုင်ငံ၌ မြန်မာစာ သင်ကြားရေးစင်တာများ တရားဝင်ဖွင့်လှစ်နိုင်ရေး (သို့မဟုတ်) ထိုင်းနိုင်ငံရှိ ကျောင်းများတွင် မြန်မာစာသင်ကြားခွင့်ရရှိရေးနှင့် သင်ကြားပေးမည့် မြန်မာ ဆရာ/ ဆရာမ များ တရားဝင်ဖြစ်ရေးကို နည်းလမ်းများ ဝိုင်းဝန်းရှာဖွေ ပူးပေါင်းဆောင်ရွက်ကြရမှာ ဖြစ်ကြောင်း၊ လတ်တလောတွင် ကျောင်းများပိတ်ထားသဖြင့် ကျောင်းပြင်ပရောက်နေသည့် ရနောင်းခရိုင်မှ ကလေးငယ်များ အမြန်ဆုံး ပညာသင်ကြားနိုင်ရေးအတွက် နည်းလမ်းရှာဖွေပေးကြစေလိုကြောင်း အဓိကဆွေးနွေးပြောကြားခဲ့ပြီး ထိုင်းလွှတ်တော် ဒုတိယဥက္ကဋ္ဌက ယခုကိစ္စကို ဖြေရှင်းနိုင်ရေးအတွက် နှစ်နိုင်ငံအကြား လုပ်ငန်းအဖွဲ့များဖွဲ့၍ ဆောင်ရွက်သွားရေးနှင့် လတ်တလော ဖြေရှင်းရမည့် ရနောင်းကျောင်းမှ ကလေးငယ်များ ပညာဆက်လက်သင်ကြားနိုင်ရေးအတွက် ထိုင်းဘက်အနေဖြင့် ရနောင်းခရိုင် အုပ်ချုပ်ရေးမှူး ဦးဆောင်၍ သက်ဆိုင်ရာ အဖွဲ့ဝင်များပါဝင်မည့် လုပ်ငန်းအဖွဲ့ကို ဖွဲ့စည်း၍ မြန်မာဘက်မှလည်း အလားတူ ကော့သောင်းခရိုင် အုပ်ချုပ်ရေးမှူး ဦးဆောင်သည့်အဖွဲ့ ဖွဲ့စည်းကာ ဆက်လက် ညှိနှိုင်းဆောင်ရွက်ခြင်းဖြင့် ဖြေရှင်းနိုင်မည် ဖြစ်ကြောင်း၊ ရေရှည်အတွက်လည်း ကျန်ရှိသည့် မြန်မာစာ သင်ကြားရေးစင်တာများ တရားဝင်ဖြစ်ရေး၊ ဆရာ/ ဆရာမများ တရားဝင် သင်ကြားခွင့်ရရှိရေးအား နှစ်ဖက်လုပ်ငန်းအဖွဲ့များ ဖွဲ့စည်း၍ ထိုင်းဥပဒေနှင့် အညီဖြစ်စေရေး ဆက်လက်ဖော်ဆောင်သွားရမည်ဖြစ်ပါကြောင်း ဆွေးနွေးပြောကြားခဲ့ပါသည်။

ယင်းနောက် နှစ်ဖက်ညှိနှိုင်းဆွေးနွေးချက်များအရ ထိုင်းနှင့် မြန်မာတို့မှ သက်ဆိုင်ရာ တာဝန်ရှိသူများ ပါဝင်သည့် လုပ်ငန်းအဖွဲ့များ အသီးသီးဖွဲ့စည်း၍ ထိုင်းနိုင်ငံရှိ မြန်မာရွှေ့ပြောင်းအလုပ်သမားများ၏ ကလေးငယ်များ မြန်မာစာသင်ယူနိုင်ရေးအတွက် ယင်းလုပ်ငန်းအဖွဲ့များမှ အသေးစိတ် ညှိနှိုင်းဆောင်ရွက်ရန် သဘောတူညီခဲ့ကြောင်း သိရှိရသည်။